Mbi 100 milionë euro aktivitet mashtrimi, sipas informacioneve të siguruara nga Pamfleti. Florian Sula dhe Flladi Malaj identifikohen si dy kokat e dyshuara të rrjetit që i ka mbijetuar goditjeve policore. Nga prestanomet te kompanitë, minierat, vilat dhe bizneset turistike, zbërthehen emrat dhe investimet që shoqërojnë dosjen e call center-ave.
Mbi 100 milionë euro është volumi i aktivitetit të mashtrimit që burimet policore i atribuojnë rrjetit të call center-ave të lidhur me Florian Sulën dhe Flladi Malajn. Dy biznesmenët identifikohen si organizatorët kryesorë të dyshuar të një skeme që prej vitesh ka shënjestruar qytetarë europianë, duke u marrë para përmes investimeve fiktive në Forex.
Paratë, sipas denoncimit, kanë ushqyer një rrjet biznesesh, pronash dhe investimesh, ku dyshohet se përdoren prestanome për të fshehur përfituesit realë. Nga zyrat në Tiranë, gjurmët shkojnë te kompanitë e marketingut, agjencitë imobiliare, industria minerare dhe turizmi në bregdet.
Më 22 shtator 2023, operacioni “Momentum” goditi një call center me rreth 60 punonjës. Dy administratorë u arrestuan dhe 68 mijë euro u sekuestruan. Në qershor 2026, operacioni “End Point” solli shtatë arrestime, 27 të proceduar dhe sekuestrimin e 70 kompjuterëve e 49 celularëve.
Bjorn Kareco dhe Marjo Kolli janë dy emrat që rishfaqen në informacionet për të dyja operacionet. Flladi Malaj përmendet si kontrolluesi i dyshuar i aktivitetit të tyre.
Tre vite, dy operacione, të njëjtët administratorë. Ndërkohë, hetimi financiar i bërë publik nuk ka zbardhur përfituesit e miliona eurove që dyshohet se janë qarkulluar nga mashtrimet.
Flladi Malaj, kompanitë nga Selita te minierat e Kukësit
Në tetor 2019, Flladi Malaj regjistroi Momentum Group, kompani që ka kontrolluar historikisht Dekript Media Group dhe Akademia Profesioneve M&G. Në INFO TIRANA zotëronte 50% të kapitalit, ndërsa gjysmën tjetër e kishte Taulant Ahmetaj.
Malaj kishte 80% të kuotave të ACME Studio, përkrah Xhorxh Xhanit. Në dhjetor 2019 bleu Albreeze nga Albes Lazaj dhe Momentum Optimo për 3 milionë lekë, afërsisht 30 mijë euro.
Momentum Group, ACME Studio dhe Albreeze rezultojnë me të njëjtën referencë historike pasurie në Selitë, në Rrugën Prokop Mima. Pikërisht Selita dhe Komuna e Parisit përmenden në informacionet policore si zona ku kanë funksionuar zyra të call center-ave.
Emri i Malajt shfaqet edhe në historikun e pronësisë së MEB 2018 Skorje, kompani e lidhur me ish-Uzinën e Shkrirjes së Bakrit në Kukës. Në strukturën e listuar të kapitalit figurojnë Bastri Malaj, Erion Berberi dhe Megan Malaj. Të ardhurat e kompanisë u rritën nga 167 mijë lekë në vitin 2021 në 35,3 milionë lekë, rreth 350 mijë euro, në vitin 2023.
Në prill 2026, dy muaj përpara operacionit “End Point”, Malaj regjistroi FLLAD COLLECTION në Radhimë, me kapital 6,5 milionë lekë, rreth 65 mijë euro. Kompania rezulton në pronësinë e tij të plotë dhe ka në objekt hotele, vila, restorante e shërbime turistike.
Florian Sula, një prej kokave të mashtrimit dhe pasuritë në Jug
Florian Sula përshkruhet në informacionet e siguruara nga Pamfleti si një prej drejtuesve kryesorë të mashtrimit me call centera, përkrah Flladi Malajt. Dyshimet për veprimtarinë e tij shtrihen edhe te investimi i parave të përfituara në pasuri të paluajtshme dhe projekte turistike.
Në mars 2026, Sula u mor peng në Tiranë dhe u dërgua në Xhafzotaj. Rrëmbyesit i kërkuan fillimisht dy milionë euro. Për ngjarjen u arrestuan Hysen, Kevin dhe Jurgen Neza.
Informacionet për pasuritë e Sulës përfshijnë toka dhe projekte turistike nga Borshi në Himarë. Origjina e fondeve dhe personat që figurojnë në dokumentet e pronësisë janë pjesë e dyshimeve për investimin e fitimeve të call center-ave.
ARKA HOME, Century 21 dhe pasuritë në Farkë
Në prill 2025 u themelua ARKA HOME, kompani imobiliare ku Xhuljano Malaj zotëron 35% të kapitalit dhe Katerina Berberi 30%.
Fisnik Begollari, broker në CENTURY 21 Partners në kompleksin Delijorgji, është një tjetër person që përmendet në denoncimin për pastrim parash. Atij i atribuohet një vilë luksoze pranë liqenit të Farkës, me sipërfaqe mbi një mijë metra katrorë dhe vlerë të pretenduar mbi 1,5 milionë euro.
Sipas informacionit policor, Begollari dyshohet se ka pasur marrëdhënie me aktivitetin e Sulës dhe Malajt, ndërsa investimet imobiliare përbëjnë një prej pistave të fshehjes së të ardhurave.
Shtetasi A. Koxhaxhiku përmendet në denoncim për lidhje me Rolex Bar te 21 Dhjetori, makina me qira, lavazhe dhe pasuri të paluajtshme. R. Prifti nga Elbasani paraqitet si bashkëpunëtor në disa prej aktiviteteve. Informacioni përfshin edhe një konflikt të dyshuar për pagesa në kriptovaluta, të lidhur me një plagosje gjatë vitit 2026.
B. Kuca dhe D. Daliu përmenden si persona të dyshuar për menaxhimin e zyrave të call center-ave dhe administrimin e aktivitetit. Në listën e bizneseve të përfshira në informacion figuron edhe BelleVue Dental Care.
Këto janë hallkat e tjera të rrjetit të përshkruar në denoncimin e Pamfletit, ku dyshohet se fitimet e mashtrimeve janë investuar përmes kompanive dhe pronave të regjistruara në emra të ndryshëm.
Mbi 100 milionë euro aktivitet mashtrimi i shtrirë në vite, kush i mori paratë?
Dy operacione policore, administratorë që rishfaqen, kompani që ndërrojnë ortakë dhe investime në disa sektorë të ekonomisë. Informacionet e siguruara nga Pamfleti e vlerësojnë aktivitetin e mashtrimit të rrjetit në mbi 100 milionë euro, një shifër që përfshin qarkullimin e pretenduar dhe jo një shumë të dokumentuar si fitim neto.
Florian Sula dhe Flladi Malaj janë dy personat që burimet identifikojnë si drejtuesit e dyshuar të këtij mekanizmi. Rreth tyre përmenden administratorë, prestanome të dyshuara, agjenci imobiliare, biznese shërbimi dhe investime turistike.
Policia ka sekuestruar 68 mijë euro në operacionin e vitit 2023 dhe pajisje elektronike në vitin 2026. Denoncimi, ndërkohë, flet për një aktivitet që kalon 100 milionë euro. Kush i ka arkëtuar, ku kanë përfunduar dhe në emër të kujt janë investuar? /Pamfleti
